ဆုံးရှုံးနိုင်ခြေမြင့်မားသည့် မှုခင်းများနှင့်ဆက်နွယ်သည့် ငွေကြေးခဝါချမှု အန္တရာယ်များ ဖော်ထုတ်ခြင်း ဆွေးနွေးပွဲ

မြန်မာနိုင်ငံတော်ဗဟိုဘဏ်က ဦးဆောင်၍ ငွေကြေးဆိုင်ရာ စုံစမ်းထောက်လှမ်းရေးအဖွဲ့ (Financial Intelligence Unit FIU) နှင့် ကုန်သည်စက်မှုအသင်းချုပ်တို့ ပူးပေါင်းကျင်းပသော “ဆုံးရှုံးနိုင်ခြေမြင့်မားသည့် မှုခင်းများနှင့်ဆက်နွယ်သည့် ငွေကြေးခဝါချမှုအန္တရာယ်များ ဖော်ထုတ်ခြင်း ဆွေးနွေးပွဲ” ကို ၂၀၂၃ ခုနှစ်၊ ဖေဖော်ဝါရီလ ၁၇ ရက်နေ့တွင် ကုန်သည်စက်မှုအသင်းချုပ်၌ ကျင်းပခဲ့သည်။

ငွေကြေးခဝါချမှုနှင့် အကြမ်းဖက်မှုကို ငွေကြေးထောက်ပံ့မှုတိုက်ဖျက်ရေးလုပ်ငန်းအဖွဲ့ ဥက္ကဋ္ဌ၊ မြန်မာနိုင်ငံတော်ဗဟိုဘဏ် ဥက္ကဋ္ဌ ဒေါ်သန်းသန်းဆွေက အဖွင့်အမှာစကားပြောကြားရာတွင် ငွေရေးကြေးရေးကဏ္ဍကို အသုံးပြု၍ ငွေကြေးခဝါချမှုအန္တရာယ်မှာ တိုင်းပြည်၏ စီးပွားရေးသာမက ပြည်သူတစ်ရပ်လုံး၏ အကျိုးစီးပွားကိုပါထိခိုက်စေမှာဖြစ်ကြောင်း၊ Reporting Agencies များနှင့် ငွေကြေးအာဏာပိုင် အဖွဲ့အစည်း (Competent Authorities) သည် ငွေကြေးခဝါချမှု အန္တရာယ်များကို နားလည်သိရှိပြီး သံသယဖြစ်ဖွယ် အချက်အလက်များကို ထိထိရောက်ရောက်သတင်းပို့ရန် လိုအပ်ကြောင်း၊ မြန်မာနိုင်ငံအနေဖြင့် FATF ၏ Recommendation များကို Action Plans များ ချမှတ် ဆောင်ရွက်၍ ငွေလွှဲလုပ်ငန်းနှင့် ပတ်သက်၍ Rating တိုးမြှင့်ရရှိခဲ့ပြီးဖြစ်ကြောင်း၊ အစိုးရပိုင်းသာမက ပုဂ္ဂလိကဏ္ဍမှပါ  ပူးပေါင်းဆောင်ရွက်မှု ပိုမိုအရေးကြီးပါကြောင်း၊ လက်ရှိတွင်လည်း ပူးပေါင်းဆောင်ရွက်မှုရှိပြီး နိုင်ငံ၏ ပုံရိပ်ကို  ကောင်းမွန်စေရန် အတူတကွ ကြိုးပမ်းဆောင်ရွက်ရမှာဖြစ်ကြောင်း၊ Public – Private အားလုံးအတူတကွ ပူးပေါင်း ဆောင်ရွက်ခြင်းဖြင့် ကောင်းမွန်သည့်အကျိုးရလဒ်များရှိနိုင်မှာဖြစ်ကြောင်းပြောကြားခဲ့သည်။

ဆက်လက်၍ မူးယစ်ဆေးဝါးတားဆီးနှိမ်နင်းရေးရဲတပ်ဖွဲ့၊ တားဆီးနှိမ်နင်းရေးဌာန၊ ဌာနခွဲမှူး ဒုတိယရဲမှူးကြီး ဒေါ်ပြုံးက မူးယစ်ဆေးဝါးနှင့်ဆက်နွယ်သည့် ငွေကြေးခဝါချမှုအန္တရာယ်များ ဖော်ထုတ်ခြင်းကို ဆွေးနွေးတင်ပြခဲ့ပြီး ဦးထင်ကျော်သိန်း (အဖွဲ့ခေါင်းဆောင်၊ Prudential, AML and Risk Committee, မြန်မာနိုင်ငံဘဏ်များအသင်း) က ယခုလက်ရှိ ဘဏ်များတွင် ငွေကြေးဆိုင်ရာ တရားဝင်မဟုတ်သည့် နည်းလမ်းများကြောင့် ဖြစ်ပေါ်လာနိုင်သည့် အန္တရာယ်များ၊ ဆုံးရှုံးနိုင်ခြေအန္တရာယ် (Risk) မြင့်မားစေမည့်အခြေအနေများ ဖော်ထုတ်ခြင်းဆိုင်ရာ နည်းလမ်းများကို သေချာစွာ သိရှိနားလည် သဘောပေါက်စေရန် သင်တန်းများပေးခြင်းနှင့် ငွေကြေးခဝါချခြင်း (Money Laundering) ဆိုင်ရာ ဆုံးရှုံးနိုင်ခြေအန္တရာယ် စောင့်ကြပ်ကြည့်ရှုခြင်း၊ သတင်းပေးပို့ခြင်းတို့နှင့် စပ်လျဉ်း၍ ရှင်းလင်းဆွေးနွေးခဲ့သည်။

မြန်မာနိုင်ငံတော်ဗဟိုဘဏ် နိုင်ငံခြားသုံးငွေ စီမံခန့်ခွဲမှု ဌာန ညွှန်ကြားရေးမှုးချုပ် ဒေါ်နွယ်နီထွန်းက ပြည်ပငွေလွှဲလုပ်ငန်းလုပ်ကိုင်ခွင့် လိုင်စင်ရရှိသူ ကုမ္ပဏီများ ငွေလွှဲလုပ်ငန်းနှင့် ပတ်သက်၍ ကုမ္ပဏီ၏ ဒါရိုက်တာနှင့် စီမံခန့်ခွဲသူများတွင်ရှိရမည့် စံသတ်မှတ်ချက်များ ရှင်းလင်းပြောကြားခဲ့ပါသည်။

ယင်းနောက် ရင်းနှီးမြှုပ်နှံမှုနှင့်ကုမ္ပဏီများညွှန်ကြားမှုဦးစီးဌာနက ထုတ်ပြန်ခဲ့သည့် ညွှန်ကြားချက်များနှင့် ပတ်သက်၍ ရှင်းလင်း ဆွေးနွေးရာတွင် ညွှန်ကြားချက်အမှတ် (၁၃၆/ ၂၀၂၁) အရ ကုမ္ပဏီ/ အဖွဲ့အစည်းများအနေဖြင့် ငွေကြေးဆိုင်ရာကိစ္စများဆောင်ရွက်ရာတွင် မိမိတို့ ကုမ္ပဏီ/အဖွဲ့အစည်း အမည်ဖြင့် သီးခြားဘဏ်ငွေစာရင်း (Corporate Account) များ ဖွင့်လှစ်ဆောင်ရွက် ရမည်ဖြစ်ကြောင်း၊ ညွှန်ကြားချက်အမှတ် (၇/၂၀၂၃) အရ ဥပဒေနှင့်အညီ အလှည့်ကျဒါရိုက်တာခန့်အပ်ရန်ကိုလည်း ခွင့်ပြုထားပြီး ဥပဒေနှင့်မညီညွတ်သော အမည်ခံဒါရိုက်တာများခန့်အပ်ခြင်းကို လုံးဝခွင့်မပြုပါကြောင်း၊ အမည်ခံအစုရှယ်ယာရှင်များအမည်ဖြင့် မှတ်ပုံတင်စာရင်းရေးသွင်းခြင်းကိုလည်း ခွင့်မပြုပါကြောင်း၊ ကုမ္ပဏီတွင်ပါဝင်သူများ၏ မှတ်ပုံတင်စာရင်းတွင် မှတ်ပုံတင်စာရင်းရေးသွင်းထားသော လူပုဂ္ဂိုလ်/ ဥပဒေဆိုင်ရာပုဂ္ဂိုလ်ကိုသာလျှင် အမှန်တကယ်အကျိုးခံစားခွင့်ရှိသူ ပိုင်ရှင်အဖြစ် သတ်မှတ်မည် ဖြစ်ကြောင်း၊ ညွှန်ကြားချက်အမှတ် (၁၁/၂၀၂၃) အရ ကုမ္ပဏီအဖွဲ့အစည်းများ၏ အခြေခံသတင်း အချက်အလက်နှင့် အကျိုးခံစားခွင့်ရှိသူ ပိုင်ရှင်ဆိုင်ရာ အချက်အလက်များဖလှယ်ရာတွင် ဆက်သွယ် ဆောင်ရွက်နိုင်ကြောင်း တို့ကို ရှင်းလင်းဆွေးနွေးခဲ့သည်။

ဆွေးနွေးပွဲတွင် စာရင်းကိုင်များအသင်း၊ အိမ်ခြံမြေ ဝန်ဆောင်မှုအသင်း၊ ရှေ့နေများအသင်း၊ ကျောက်မျက်ရတနာ ရောင်းဝယ်ရေးလုပ်ငန်းများ၊ အဖိုးတန်သတ္တု (ရွှေ) ရောင်းဝယ်ရေးလုပ်ငန်းများက ငွေရေးကြေးရေးမဟုတ်သော စီးပွားရေးလုပ်ငန်းများနှင့် ကျွမ်းကျင်မှုဆိုင်ရာ အသက်မွေးဝမ်းကျောင်း လုပ်ငန်းများ (DNFBPs) များက ဖော်ထုတ်ရရှိသည့် ငွေကြေးခဝါချမှု အန္တရာယ်များနှင့်ပတ်သက်၍ အသီးသီး ရှင်းလင်းဆွေးနွေးခဲ့ကြသည်။

ဆွေးနွေးပွဲသို့ အသင်းချုပ်ဖက်မှ ဥက္ကဋ္ဌ ဦးအေးဝင်း၊ အထွေထွေအတွင်းရေးမှူးချုပ် ဒေါ်ခိုင်ခိုင်နွယ်၊ တွဲဖက်အထွေထွေအတွင်းရေးမှူး ဦးအောင်ဇေယျာလွင်၊ အကျိုးဆောင်စာရင်းစစ် ဦးဝေဖြိုး၊ ဗဟိုအလုပ်အမှုဆောင်များ၊ အလုပ်အမှုဆောင်များ၊ ညီနောင်အသင်းများမှ တာဝန်ရှိသူများ၊ ငွေကြေးဆိုင်ရာ အဖွဲ့အစည်းများမှ တာဝန်ရှိသူများ အပါအဝင် သက်ဆိုင်သူများနှင့် စိတ်ပါဝင်စားသူများ စုစုပေါင်း(၂၄၀) ဦးခန့် တက်ရောက်ခဲ့ကြသည်။