ဧရာ၀တီဖောင်ဒေးရှင်းမှ ဆန်အိတ် (၁၅၀၀၀)အား မြန်မာနိုင်ငံအတွင်းရှိ COVID-19 ကြောင့် လိုအပ်သည့် နေရာများတွင်အသုံးပြုနိုင်ရန်လှူဒါန်း

      

      

 

ဧရာဝတီဖောင်ဒေးရှင်းဥက္ကဋ္ဌဦးဇော်ဇော်နှင့်ဘုတ်အဖွဲ့ဝင်များ၏ဆွေးနွေးတိုင်ပင်မှုဖြင့် မြန်မာနိုင်ငံတစ်ဝန်းလုံးမှ COVID-19 ကြောင့်လိုအပ်သည့်နေရာဒေသများတွင် အသုံးပြုနိုင်ရန်အတွက် သိန်း (၄၀၀၀ )တန်ဖိုးရှိဆန်အိတ်ရေ (၁၅၀၀၀)ကို တိုင်းဒေသကြီးနှင့် ပြည်နယ်အစိုးရအဖွဲ့များမှတစ်ဆင့်လှူဒါန်းသွားရန်ဆုံးဖြတ်ခဲ့ပါသည်။ဧပြီလ(၆)ရက်နေ့မှ စတင်ပြီး ရန်ကုန်တိုင်းဒေသကြီးအစိုးရအဖွဲ့ဝန်ကြီးချုပ်ဦးဖြိုးမင်းသိန်းထံသို့ ဆန်အိတ်(၂၅၀၀)၊ မန္တလေးတိုင်းဒေသကြီး အစိုးရအဖွဲ့ ခေတ္တဝန်ကြီးချုပ် ဦးဇာနည်အောင်နှင့် မြို့တော်ဝန် ဒေါက်တာရဲလွင်တို့ထံသို့ ဆန်အိတ် (၂၅၀၀)၊ စစ်ကိုင်းတိုင်းဒေသကြီး အစိုးရအဖွဲ့ ဝန်ကြီးချုပ် ဦးမြင့်နိုင်ထံသို့ ဆန်အိတ်(၁၀၀၀)၊ ပဲခူးတိုင်းဒေသကြီး အစိုးရအဖွဲ့ဝန်ကြီးချုပ် ဦးဝင်းသိန်းထံသို့ဆန်အိတ် (၁၀၀၀)၊ ကယားပြည်နယ် အစိုးရအဖွဲ့ ဝန်ကြီးချုပ် ဦးအယ်ဖောင်းရှို ထံသို့ ဆန်အိတ် (၁၀၀၀)၊ စုစုပေါင်း ဆန်အိတ်ရေ (၈၀၀၀)ကို ကူညီထောက်ပံ့ခဲ့ပြီး ဖြစ်သည်။ ကျန်ရှိသော တိုင်းဒေသကြီးနှင့် ပြည်နယ်များသို့ ဆန်အိတ်ရေ (၇၀၀၀)ကိုလည်း လာမည့် ရက်ပိုင်းအတွင်း ဆက်လက် လှူဒါန်းသွားမည် ဖြစ်ပါသည်။ ဧရာဝတီဖောင်ဒေးရှင်း အနေဖြင့် COVID-19 ကာကွယ်တိုက်ဖျက်ရေး လုပ်ငန်းစဉ်များတွင် အင်တိုက်အားတိုက် ပါဝင်ကူညီလျက်ရှိပြီးကျန်းမာရေးဝန်ထမ်းများအတွက် ကျန်းမာရေးအာမခံရန်ပုံငွေ မတည်ပေးခြင်းနှင့်နေထိုင်စားသောက်သွားလာရေးပံ့ပိုးကူညီမှုများဆောင်ရွက်ပေးလျက်ရှိသည်။ထို့အတူလိုအပ်လျက်ရှိသော ဆေးရုံသုံးကာကွယ်ရေးပစ္စည်းများ လှူဒါန်းခြင်းနှင့် ပြည်ပမှ ပြန်လည်ဝင်ရောက်လာသူများ အတွက် Facility Quarantine Center များနှင့် အကျွေးအမွေးပံ့ပိုးပေးခြင်းများ ဆောင်ရွက်ပေးလျက် ရှိပါသည်။ ဧရာဝတီ ဖောင်ဒေးရှင်း အနေဖြင့် COVID-19 အတွက် ငွေကျပ် သိန်း (၈၃၀၀)ကျော် သုံးစွဲခဲ့ပြီးဖြစ်ကာ ငွေကျပ် သိန်း(၄၀၀၀)နှင့် ညီမျှသော ဆန်အိတ် (၁၅၀၀၀)ကို ထပ်မံ ကူညီထောက်ပံ့ပေးခြင်း ဖြစ်ပါသည်။